STARTSEITESchikurs der zweiten Klassen in Eben im Pongau

13.- 18. Dezember 1999

 

Obfoat, Montag,13. Dez.

 

Scho um holwa ochte hom sie die Schi und Snowboards bei da Hartberghalle g’stapelt und die Muttis und Vatis hom ihre Schatzis umarmt und busslt, bis sas endlich weglossn hom. Sofort, wia olls im Bus woa, san ma ogflitzt in Richtung Garten Eben! Noch drei Stunden Fohrt, hundert Runden „Savez- vous passé " und sicha vierzig Runden" Emma treiben", woa ma endlich do!

 

Dann homa olle aufgweckt und san ca. 500 Meta stahl bergauf glatscht, wal da Bus die Auffahrt zum Heim wegen dem vülen Schnee net gschofft hot. Noch´m Mittaogess´n und ana holben Stund Pause hom uns die Lehrer dann aus die Zimma gjaukt und auf die Pist‘n ghetzt.

Am ersten Tog san ma in die Flachau gfoan. Während die guten Foahrer die Pist’n owiprescht san, hot’s die Botschaln am Babyhang kräftig aufs Orscherl g‘haut!

 

Noch dem ersten Tog hom ma scho olle waschlnoss hamgjammert. Owa noch ana Dusch san ma dann wieda auftaut! Nochdem Obendess´n san ma no in die hochinteressanten Pistenregeln eingweiht woan.

Dann san zwoa net olle hunzmiad in die Bettn gflogn, so wia sie a Lehrer des wünscht, sondan hom sie no mit ollerhond Bledsinn bis tiaf in die Nocht wochkoltn! Wia olladings um holwa drei a Zug im Ort nua mehr das einzig Aufregende woa, homs dann endlich olle gschlofn.

 

Dienstag, 14.Dez

As Fruastuck woa guat! Wia san wieda in die Flachau gfoan. Noch dem Aufwärmen, wo ma wia Hiandln im Kreis glafn san, san ma (Anfänger) mitn Snowboard im Schlepptau die Pist’n aufiglatscht und san owagrutscht- am Oasch. Desmol hots uns owa net so oft aufgschtrat, wal heit hom ma nämlich as Bogerl glernt! Nach dem Mittagessen san mas no amol augongan und hom uns auf da Pistn broatgmocht! Desmol san ma hunzmiad hamkumman! Wia Snowboardanfänger jedenfolls! Wia san auf olle viere daherkrallt. Unsre Knia woan violett, unsre Hintern blau und unsre Schädl hochrot! Die Schifohrer haben a wenig entspannter dreingschaut.

As hochexplosive Abendprogramm woa desmol a Fülm üwas Snowboarden.

 

Mittwoch, 15. Dez.

Ein höchst liebenswürdiger Schülerweckdienst hot uns diesmol aus die Bett’n g’haut. Heit san ma üwa Mittag zum Zauchensee gfoan,ausgrüstet mit am Lunchpaket.

Ein Tipp für olle zukünftigen Schikursfahrer: Tuats die Jausn jo net in Rucksock eini! Wal wenns eich schmeisst, schauts nochher bled aus da Wäsch! I sog nur Mohlzeit zu zamdatschgate Wuaschtsemmln, wo irgendwo in da Mittn a Smarties pickt!

 

Donnerstag, 16.Dez

Am Donnerstog woa ma nur am Vormittag beim Zauchnsee, am Nachmittag ham ma frei kabt! Zu hohe Verletzungsgefahr! Also is a Tal bei die Verletzten daham blibn und a Tal hot sie in Oltenmoakt ins Café g‘haut. Wos i was, hom ma drei Verletzte kopt:

  • die Pamela hot sie angeblich die Hand brochn (woa owa a Schmäh vom Oazt, der Knochen hot net amol an Krotza kopt!)

  • die Maria- Elena hots dermaßn aufn Schädl pickt, dass a Gehirnerschütterung kriagt hot.

  • Und ane, wo i jetzt net was, wias hast, hot sie as Knie verbog‘n.

Owa wies am Abend zur Disco gongan is, is olle wieda guat gongan! In da „Rumpikommer", des is die einzige Disco im Umföd von Lichtjoan, is nämlich umgangen! Unterwegs hom ma no a poa Fuaßbolla eingschtrafft und dann is losgangen. Sogoa unsre Lehrer hom sie auf die Tanzflächn verirrt! I sog’s eich, wos wia glocht hom!

Freitag, 17.Dez

As letzte Mol san ma in da Frua zur Flachau gfoan. Die Snowboard-anfänger san inzwischen weg vom Babyhang und hom sie die Gondlobfoat vorgnumman! Wia san goa net schlecht gfoan, nur noch dem Tog hätt’n a poa am liabstn des Brettl um die Erd’n kaut! Unsre Profi-snowboarder san a vorbeigflitzt und üba a poa Schanzn ghupft. Sogoa unsre Spitzenschifoahrer hots amol aufkaut, des hot den Tog dann perfektioniert!

 

Hüttenabend:

I sog eich, des woa wos. Andrella, unsre flotte Blondine, hot uns olles üwa Viagra verroten, und des Riesenbaby, des dann no kumman is, hot uns sowiesi olls gebn! Owa es is no weita gongan! Unsre Maria hot nämlich Geburtstog ghobt! Des hom ma dann ah no gfeiert! Und wia!

 

 

 

Samstag, 18. Dez

Und scho woas vorbei mit da Gaude in Eben! Schwupps, woa ma scho wieda auf da Hamfoat! Owa ans sog i eich, der Schikurs hot sie auszohlt! Owa so richtig! So schen und suppa es ah woa, olle woa ma froh,wia ma wieda daham woan

Bericht: Eva Horvàth, 2A